دیوانی چاودێری دارایی راپۆرتێكی له‌باره‌ی كه‌یسی ئه‌و خانه‌نشینانه‌ی كه له‌ده‌ره‌وه‌ی یاسا خانه‌نشین كراون ئاماده‌كردبوو، بووه جێگای سه‌رنج و ره‌خنه‌ی هه‌ندێك له ئه‌ندام په‌رله‌مانه‌كانی كوردستان كه ده‌یان گوت: له‌به‌ر چی ناوی خانه‌نشینه‌كان و لایه‌نی به‌رپرس له خانه‌نشین كردنیان نه‌هاتووه و ته‌نها پۆلینی جۆرا و جۆریان بۆ كراوه؟
له‌م باره‌یه‌وه دیوانی چاودێری دارایی به‌م شێوه‌یه وه‌ڵامی ره‌خنه و تێنییه‌كانی ئه‌ندام په‌رله‌مانه‌كانی دایه‌وه و به‌رزی كرده‌وه بۆ په‌رله‌مانی كوردستان/ لیژنه‌ی ده‌ستپاكی، لیژنه‌ی دارایی و لیژنه‌ی پێشمه‌رگه:
پێمان باشه ئه‌م روونكردنه‌وەیه بخه‌ینه به‌رده‌ستتان تاكو هه‌موو لایه‌ك به ته‌واوی له‌یه‌ك تێبگه‌ین:
- دیوان به روونی باسی له‌م كه‌یسانه كردوه و راسپارده‌ی خۆشی خستۆته روو.
- نه‌هێنانی ناوی خانه‌نشینه‌كان نابێته رێگر له‌به‌رده‌م ئه‌و بڕیاره‌ی له راپۆرته‌كه‌دا راسپارده كراوه.
- له‌بنه‌ڕه‌تیشه‌وه ئێمه ناتوانین ئه‌م كه‌یسه وه‌ك كه‌یسه‌كانی دیكه ئه‌ژمار بكه‌ین و مامه‌ڵه‌ی له‌گه‌ڵدا بكه‌ین.
- دیوانی هه‌موو ئاماده‌ییه‌كی خستۆته‌ڕوو بۆ هه‌ماهه‌نگی و هاوكاری لایه‌نه په‌یوه‌ندیداره‌كان.