رۆژی چوارشه‌ممه رێكه‌وتی 10/2/2015 له باڵه‌خانه‌ی په‌رله‌مانی كوردستان هه‌ریه‌كه له به‌ڕێزان جه‌عفه‌ر ئیمینكی جێگری سه‌رۆكی په‌رله‌مان و فه‌خره‌دین قادر عارف سكرتێری په‌رله‌مان پێشوازیان له به‌ڕێز خالید هادی چاوشلی سه‌رۆكی دیوانی چاودێری دارایی هه‌رێمی كوردستان كرد.
له كۆبوونه‌وه‌یه‌كدا جێگری سه‌رۆكی په‌رله‌مان و سكرتێری په‌رله‌مان به‌ناوی په‌رله‌مانه‌وه، پشتیوانی خۆیان بۆ كار و به‌رنامه‌كانی دیوانی چاودێری دارایی دووپات كرده‌وه و به‌ڵێنیان دا كه هه‌میشه به‌و په‌ڕی دڵسۆزییه‌وه پشتگیری له دیوانی چاودێری دارایی بكه‌ین، تاكو بتوانن به‌سه‌ركه‌وتووانه ئه‌ركه‌كانیان به‌جێبهێنن.
له به‌رانبه‌ردا به‌ڕێز سه‌رۆكی دیوانی چاودێری دارایی سوپاسی هه‌ڵوێستی خه‌مخۆرانه و جوامێرانه‌ی په‌رله‌مانی كوردستانی كرد و به‌ڵێنیدا كه هه‌موو توانایه‌كی خۆی بخاته‌گه‌ڕ له‌پێناو سه‌رخستن و به‌دیهێنانی ئه‌و ئامانجانه‌ی كه دیوانی چاودێری دارایی بۆ دامه‌زراوه.